Press Statement Leonardo Panaligan Command

Sgd. Ka JB Regalado

Spokesperson

LPC-BHB-CN

Hunyo 29, 2017

AFP NABIHANGAN SA MGA MADINALAG-ON NGA ATAKE SANG NPA

Daw ido-buang ang AFP nga nagataghol sa serye sang pagpang-atake sang NPA sa isla sa pagpanguna ni Major Gen. Jon Aying sang 3rd IDPA diin nabihangan sang iya ginakupal nga wala na sang kusog ang NPA sa Negros. Ginatikal man sang AFP ang 2 ka Geographical Battalion nga dugang kuno nga pwersa militar sa isla nga amo ang magpaseguro sang kalinong kag katawhay.

Sa baylo malutsan gihapon sang NPA diin madinalag-on nga nagpatigayon sang lapnagon nga pagpang-atake batok sa mga ahente sang kaaway kag pila pa ka mga mga indibidwal nga may mga utang nga dugo sa masa kag pumuluyo pareho nila Baby Lumayno kag AFP intel nga si Ronie Montejo.

Nabihangan man kag natublag gid ang AFP sa pagpamuno ni Maj. Gen. Jon Aying sang 3rd IDPA kag ni Governor Alfredo Maranon tungod si Baby Lumayno isa gid sa tagsakdag kag lubos nga nagasuporta sa “Marching for Peace” nga programa sang AFP kakunsabo sa Pro’PIDU ni Maranon sadtong tuig 2015 para lang depensahan ni Lumayno ang iya pagpang-agaw sang duta sa mga mangunguma, pamahug kag pagpamatay sa mga inosenteng mangunguma nga nagahimakas kag iban pa nga sibilyan.

Ang “Marching for Peace” sang AFP sa Negros labi nga ginkangil-aran sang mga pumuluyo tungod nagadulot lamang ini sang kahadlok kag pagdako sang porsyento sa paglapas sang tawhanon nga kinamatarung tuga sang grabe nga pagpang-abuso, pasismo kag militarisasyon.

Nagasanting gid ang kaugatan sa li-og ni Major Gen. Jon Aying sang AFP nga nagataghol sa pagsunod sa mando ni Gov. Alfredo Maranon sang Negros Occidental, nga kuno terorista kag bandido ang NPA matapos ang serye sang pagpang-atake sang sini sa isla. Apang sunod nga mga inadlaw liwat naman nga nagpanawagan nga padayunon ang Peacetalks.

Ini nga mga pahayag ni Major Gen. Jon Aying wala sang klaro nga punto, inconsistent kag erratic. Isa ka duso-butong nga opinyon sa publiko nga wala sang maathag nga padulungan. Ini man nga deklarasyon ni Aying malisyuso kag iresponsable tungod kay iya ginakondisyon ang pumuluyo nga atakihon ang CPP-NPA-NDF para sa justification sang AFP kag PNP sa ila mga kalakasan, kalapasan kag maitom nga ginabuko sini sa bug-os nga rebolusyonaryong kahublagan.

Wala sang rason si Maj. Gen. Jon Aying nga magpanawagan nga ipadayon ang “Peacetalks” tungod isa lamang ini ka “Lip-serving” nga pahayag nga kuno nagahandum sang kalinong apang sa aktwal nga ginahimo sang AFP tanan kabaliskaran kag mga kabutigan.

Dugang pa ang deklarasyon ni Presidente Rodrigo Duterte kag Lorenzana nga “Martial Law” kag pagsuspender sang “writ of habeas corpus” sa Mindanao nga naghalit sa kinamatarung kag pangabuhian sang kapin sa 200,000 ka mga pumuluyo. Ang masubo sa tanan ang pagkadula sang kabuhi sang mga inosenteng sibilyan kag bisan pa man gani ang AFP kag PNP. Ini wala sang nagakaigo nga basehan diin naghalit indi lang sa Marawi City, sa Mindanao kundi sa bilog nga pungsod tungod sang wala-tuo nga mga tsekpoynt, pagpamomba kag iban pa nga porma sang pagpang-atake sang AFP kag PNP nga sobra na sa ila otoridad. Gilayon man ini nga ginsakyan sang militar diin gin-atake man sang pagyaguta kag pagbatikos sang kadam-an nga pumuluyo sa pangpubliko nga opinyon kag massmedia. Halos ang kadam-an nagasinggitan sang “No to Martial Law”, “Martial Law Never Again!” kag iban pa nga mga panalambiton nga unta bawion ini nga deklarasyon sang Presidenteng Duterte kag AFP. Sa baylo wala ginbawi kag ginpalawig pa sa sulod sang 60 ka adlaw.

Ang matuod nga terorista kag bandido ang pasistang AFP tungod sa padayon sini nga paglapas sa tawhanon nga kinamatarung sang mga mangunguma pareho sang illegal nga pag-aresto sa duha ka mga inosente nga mangunguma nga sanday Vivian Tormis kag Nemesio Tormis sa sityo Agpapataw, Brgy. Binubuhan, Guihulngan City, Negros Oriental sadtong Mayo 21, 2017. Subong man ang paghupot sa Wanted Criminal nga si Lionel Librado. Ini nga kalakasan sang AFP ilabe na sang 79th IBPA nagapahinay sa pag-istoryahanay sa kalinong para lab-uton ang makatarungan kag malawigon nga kalinong nga dugay na ginahandum sang malapad nga pumuluyo.

Ini resulta na sang desperado nga mga tikang sang AFP dulot sang bag-o nga deklarasyon sang Martial Law sang rehimeng Duterte kag AFP kasugpon sa “All Out War” nga deklarasyon ni Duterte kag Lorenzana batok sa CPP-NPA kag bug-os nga rebolusyonaryong kahublagan sadtong Pebrero 2017.

Diin ang Kalinong nga ginasinggitan ni Major Gen. Jon Aying sang 3rd IDPA? Diin na ang “Marching for Peace” kag Pro’PIDU ni Governor Alfredo Maranon?

Samtang padayon ang “All Out War” sang Rehimeng Duterte kag AFP idalum sa Oplan Kapayapan batok sa rebolusyonaryong kahubalagan kag nagahalit sa mga pumuluyo, wala sang matuod nga kalinong. Ang NPA sa absoluto nga pagpamuno sang PKP magapadayon sa paglunsar sang lapnagon nga taktikal nga opensiba lamang ipaluntad ang malawigon kag makatarunganon nga kalinong para depensahan ang seguridad, kabuhi, interes kag palangabuhian sang masang mangunguma, mamumugon kag iban pa nga ginahimuslan kag ginapigos nga sahi.

Ginahangkat sang LPC-BHB si Maj. Gen. Jon Aying, nga kon sinsiro ka para sa makatarungan kag malawigon nga kalinong, lubos nga ipa-untat sa rehimeng Duterte-Lorenzana kag AFP ang ‘Martial Law” kag “All-Out War” batok sa CPP/NPA kag sa pumuluyo.